«Այս օրը պետական տոն է, բայց պետականորեն չի նշվում, չի գովազդվում, որովհետև այսօրվա իշխանություններն անկախական չեն, անկախությունը բարձրագույն արժեք չէ նրանց համար»: Այս մասին այսօր` մայսի 28-ին կայացած «Անկախության գործընթացը և առկա մարտահրավերները» թեմայով բանախոսության ժամանակ ասել է ՀԱԿ փոխնախագահ Արամ Մանուկյանը:
«Առաջին հանրապետությունը արժանապատվության կղզյակ է հայ ժողովրդի համար, 2.5 տարվա ընթացքում 40 երկիր ճանաչել է Հայաստանի անկախությունը: Եթե չլիներ առաջին հանրապետությունը, հավանաբար, չէր լինի 3-րդ հանրապետությունը, որտեղ մենք ապրում ենք: Պետության անհրաժեշտությունն ու կարևորությունը մատուցելը մի կուսակցության գործը չէ, պետության գործն է: Ցավոք սրտի, այսօրվա իշխանությունները դա չեն անում, ստիպված մենք ենք անում: Մենք գրքեր ենք հրատարակում, ֆիլմեր ենք ցուցադրում, անգամ այսօրվա իշխանությունը չի ցուցադրում դա: Հանրային հեռուստաընկերությունը պատվիրում է անկախության մասին ֆիլմ նկարահանել, հետո չի ցուցադրում այդ ֆիլմը, արգելում է»,-ասել է Արամ Մանուկյանը:
Անդրադառնալով 3-րդ հանրապետության ձևավորմանը, Արամ Մանուկյանն ասել է.
«1988 թվականը նպաստավոր էր շարժում սկսելու և անկախության հասնելու համար: Եթե մեզնից առաջ Սովետական Միության այլ երկրներ չգնային այդ ճանապարհով, գուցե մեզ էլ չհաջողվեր: Պահը նպաստավոր էր հաջողության հասնելու համար, բայց եթե մենք էլ ակտիվ չլինեինք, անկախության հասնել չէր հաջողվի»:
Արամ Մանուկյանի խոսքով, եթե Լևոն Տեր-Պետրոսյանը չընտրվեր գերագույն խորհրդի նախագահ, Հայաստանում անկախության հանրաքվե տեղի չէր ունենա։
«3-րդ հանրապետության խորհրդանիշները գեղարվեստական առումով իդեալական չեն, բայց դրանց հիմքում արժեքներ են դրված, նպատակը առաջին հանրապետության ժողովրդավարական ավանդույթներն ու ժառանգությունը 3-րդ հանրապետության ստեղծման հիմքում դնելն էր։ Մանկամիտներ կան՝ Ալեն Սիմոնյանով, Նիկոլ Փաշինյանով սկսած, որոնց թվում է, թե այդ ժառանգությունը պակաս կարևոր է քան նոր հիմն գրելը»,-ասել է Մանուկյանը: