«Ես կարող եմ միայն վերահաստատել հայկական կողմի պատրաստակամությունը, ստորագրել խաղաղության համաձայնագիրը, որ արդեն իսկ ամբողջությամբ համաձայնեցված է, իսկ ինչ վերաբերվում է ձգձգումներին, ապա ինչքան շուտ ստորագրվի այս համաձայնագիրը, բնականաբար, մենք կկարողանանք կենտրոնանալ տարածաշրջանային համագործակցության և մեր տարածաշրջանի բոլոր պետությունների, ժողովուրդների բարեկեցության խնդիրների հասցեագրման վրա»։ Այդ մասին, այսօր՝ մայիսի 26–ին, լրագրողների հետ ճեպազրույցի ժամանակ ասել է ԱԳ փոխնախարար Վահան Կոստանյանը՝ անդրադառնալով նրան, որ Ադրբեջանը երկու նախապայման է առաջ քաշել եւ նշել, որ մինչեւ հայկական կողմը դրանց չհամաձայնի, խաղաղության համաձայնագիրը չի ստորագրվի։
Խոսելով կոնկրետ երկու նախապայմանների մասին, նա նշել է. «Քիչ առաջ վարչապետ Փաշինյանը կրկին հայտարարեց, որ ինչ վերաբերում է ԵԱՀԿ Մինսկի խմբի մեխանիզմներին, ապա Հայաստանը պատրաստ է խաղաղության պայմանագիրը կնքելուն զուգահեռ, համապատասխան նամակ ուղղել ԵԱՀԿ նախագահողին՝ առաջարկելով լուծարել Մինսկի խմբի մեխանիզմները։ Ինչ վերաբերվում է ՀՀ սահմանադրության վերաբերյալ հարցին, այդ մասով նույնպես ներկայացվել է Հայաստանի Հանրապետության դիրքորոշումը, այն է՝ Հայաստանի ՍԴ–ն իր նախորդ տարի ունեցած համապատասխան վճռով դելիմիտացիայի հանձնաժողովների աշխատանքների աշխատակարգի մասին արդեն իսկ տվել է գնահատականը, որ չկա որևէ իրավասահմանադրական խոչընդոտ և կոնֆլիկտ մեր Սահմանադրության և Ալմա–Աթայի հռչակագրի միջև։ Ավելին, խաղաղության պայմանագիրը ունի հստակ երաշխիքներ, և ըստ էության հասցեագրում է թե հայկական կողմի մտահոգությունները Ադրբեջանի սահմանադրության հետ կապված, թե Ադրբեջանի կողմից հնչեցվող հայտարարությունները, որ իրենք էլ մտահոգություններ ունեն»։