Ինչպես արդեն գրել ենք, Ադրբեջանում լրագրողների նկատմամբ բռնաճնշումներ են իրականացվում: Մի քանի տասնյակ ընդդիմադիր լրագրողներ, լրատվամիջոցների ղեկավարներ, ովքեր քննադատում են Ալիեւյան կլանի կոռումպացված համակարգը, դատապարտվել են ազատազրկման՝ մաքսանենգության մեղադրանքով:
Օրերս Argument.az կայքի խմբագիր եւ Meydan TV-ի աշխատակից Շամշադ Աղան Meydan TV-ի գործով մեղավոր ճանաչվեց մաքսանենգության մեջ եւ նրա նկատմամբ որպես խափանման միջոց է ընտրվել 2 ամիս 1 օր կալանքը։
Լրագրողների պաշտպանության միջազգային կոմիտեն (CPJ) դատապարտել է այդ բռնաճնշումը և կոչ է արել Ադրբեջանի իշխանություններին՝ ազատ արձակել նրան և այլ բանտարկված լրագրողների։
«Շամշադ աղայի ձերբակալությունը հաստատում է Ադրբեջանի իշխանությունների տխուր մտադրությունը՝ էլ ավելի լռեցնելու երկրի առանց այդ էլ պատժված անկախ լրատվական հանրությանը», — ասել է CPJ Եվրոպայի և Կենտրոնական Ասիայի ծրագրերի համակարգող Գյուլնոզա Սաիդը:
«Ադրբեջանի կառավարությունը պետք է անհապաղ դադարեցնի լրատվամիջոցների նկատմամբ իր աննախադեպ ճնշումները և ազատ արձակի Շամշադ աղային և անարդարացիորեն բանտարկված մյուս լրագրողներին», — ասվում է կազմակերպության հայտարարության մեջ:
Փետրվարի լույս 4-ի գիշերը ոստիկանները բերման են ենթարկել լրագրողին և խուզարկել նրա տունը՝ առգրավելով համակարգիչը, բջջային հեռախոսը, եղբոր հեռախոսը և այլ համակարգչային տեխնիկա։
Փաստաբան Շախլա Գումբատովան լրատվամիջոցներին հայտնել է, որ Շամշադ աղան կալանավորվել է որպես Meydan TV-ի գործով կասկածյալ։ Meydan TV-ի վեց լրագրողներ բերման էին ենթարկվել անցյալ տարվա դեկտեմբերին նույն մեղադրանքով՝ «մաքսանենգություն, որը կատարվել է մի խումբ անձանց կողմից նախնական համաձայնությամբ»։
Ձերբակալվածները 2023 թվականի վերջից ի վեր արևմտյան ֆինանսավորման մեջ մեղադրվող 19 լրագրողների և լրատվամիջոցների աշխատողների թվում են:
Իր հերթին, «Լրագրողներ առանց սահմանների» կազմակերպությունը նույնպես դատապարտել է Շամշադ աղայի և Շահնազ Բեյլարգիզիի կալանավորումը.
«RBG-ն կոչ է անում անհապաղ ազատ արձակել այս երկու լրագրողներին և կալանքի տակ գտնվող մյուս 21 լրագրողներին»։