«Ռուսաստանը պատրաստ է կարգավորել հարաբերությունները Վրաստանի հետ այնքանով, որքանով պատրաստ է դրան Թբիլիսին».-տարեվերջին ՏԱՍՍ-ին տված հարցազրույցում ասել է ՌԴ արտգործնախարար Սերգեյ Լավրովը։
Հիշեցնենք, որ 2008 թվականից ի վեր Վրաստանի և Ռուսաստանի միջև դիվանագիտական հարաբերություններ չկան: Դրանք խզվել են վրացական կողմից 2008 թվականի օգոստոսի հակամարտությունից հետո, երբ Մոսկվան ճանաչեց Աբխազիայի և Ցխինվալի շրջանի (Հարավային Օսիա) անկախությունը։
«Մենք վճռական ենք կարգավորելու ռուս-վրացական հարաբերությունները հենց այնքանով, որքանով Թբիլիսին պատրաստ է դրան»,- նշել է նա։
Այսօր Ռուսաստանի և Վրաստանի միջև երկխոսությունը պահպանվում է Ժնևի բանակցությունների և Ռուսաստանի Դաշնության հետ հարաբերությունների հարցերով Վրաստանի վարչապետի հատուկ ներկայացուցչի և ՌԴ Դաշնային խորհրդի միջազգային հարցերով կոմիտեի ղեկավար Գրիգորի Կարասինի Պրահայում կայացած կանոնավոր հանդիպումների շրջանակներում։
2023 թվականի մայիսի կեսերին Ռուսաստանը չեղարկել է Վրաստանի քաղաքացիների համար վիզային ռեժիմը, որը գործում էր 2000 թվականից, ինչպես նաև վերացրել է Վրաստանի և Ռուսաստանի միջև ուղիղ ավիաչվերթների արգելքը, որը սահմանվել էր 2019 թվականին։
2024 թվականի հոկտեմբերին որոշում է կայացվել ընդլայնել առանց վիզայի ռեժիմը Վրաստանի այն քաղաքացիների համար, ովքեր Ռուսաստանի Դաշնություն են մուտք գործում աշխատանքային նպատակով կամ ավելի քան 90 օր ժամկետով։