Եվրոպայի խորհրդի Էթնիկ փոքրամասնությունների շրջանակային կոնվենցիայի Խորհրդատվական կոմիտեն հրապարակել է Ադրբեջանի վերաբերյալ հերթական՝ հինգերորդ զեկույցը, որը Լեռնային Ղարաբաղի հայ բնակչության վերադարձի, նրա անվտանգության, քաղաքական, հոգևոր-մշակութային և սեփականության իրավունքի երաշխիքների վրա «ուշադրություն սևեռելու» մասին է: Զեկույցի հեղինակներն Ադրբեջանի կառավարությանը կոչ են անում անհապաղ անցկացնել ԼՂ հայ բնակչության պատմամշակութային ժառանգության, քաղաքակրթական արժեքների, անհատական և համայնքային սեփականության արժանահավատ գույքագրում։
Զեկույցը դուր չի եկել Ալիեւին ու նրա ռեժիմին. նեղսրտել են, թե կոմիտեն ինչո՞ւ է սեւեռվում միայն հայ ազգաբնակչության խնդիրների և իրավունքների պաշտպանության հարցերի վրա, իսկ Ադրբեջանի ազգային այլ փոքրամասնություններին մատնում անուշադրության: Սա ակամա խոստովանություն է, որ Ադրբեջանում բոլոր փոքրամասնություններն ունեն իրավունքների և ազատությունների պաշտպանության խնդիր, որ մյուս փոքրամասնությունների և ԼՂ հայ բնակչության խնդիրները նույնական են։ Այս խոստովանությունը Եվրոպայի խորհրդին, եվրոպական մյուս կառույցներին հնարավորություն է տալիս Ադրբեջանում էթնիկ փոքրամասնությունների քաղաքական, հոգևոր-մշակութային և քաղաքացիական ազատությունների խնդիրը քննարկել համալիր մոտեցման դիրքերից: