Ողջունում եմ սոցիալական արդարությանը նվիրված մեր համաժողովը, որը ժամանակակից աշխարհում ամենակարևոր թեմաներից մեկին է անդրադառնում: Այս մասին, այսօր նոյեմբերի 5-ին, «Ճանապարհ դեպի սոցիալական արդարություն․ արժանապատիվ աշխատանք» միջազգային համաժողովի ժամանակ իր ելույթում ասել է վարչապետ Փաշինյանը:
«Յուրաքանչյուր կառավարության ու հանրության համար սոցիալական արդարությունն ունի չափազանց կարևոր նշանակություն: Ուզում եմ ձեզ հետ կիսվել սոցիալական արդարության թերևս ամենաֆունդամենտալ, ամենակարևոր գործոնով: Իմ կարծիքով՝ սոցիալական արդարությունը հնարավոր դարձնելու համար անհրաժեշտ է ապահովել կրթության հասանելիությունը բոլորի համար: Դժվար է պատկերացնել սոցիալական արդարություն առանց կրթության արդար հասանելիության: Այն բոլոր խնդիրները, որոնք ի հայտ են գալիս սոցիալական արդարության ոլորտում, դրանց մի զգալի մասը կապված է կրթության հասանելիության կամ կրթության որակի հետ»,- ասել է նա:
Փաշինյանն ընդգծեկ է, որ կրթությունը պետք է ընկալել ավելի լայն համատեքստում. «Ամենակարևոր բաղադրիչը հետևյալն է՝ սեփական կյանքը կառավարելու հմտությունների և ունակությունների ամբողջությունը, որի հիմնաքարն առաջին հերթին դրվում է հանրակրթության ոլորտի հասնալիությամբ: Մեր երկրում այս ոլորտում կան խնդիրներ, երբ կրթությունը հավասարապես հասանելի չէ բոլորին, եւ սա ամենակարևոր խնդիրներից մեկն է, որը կառավարությունը փորձում է լուծել:
Այդ խնդրի լուծմանն են ուղղված 500 մանկապարտեզ, 300 դպրոց կառուցելու, վերակառուցելու կամ հիմնանորոգելու ծրագիրն ու ակադեմիական քաղաքի նախագիծը: Այս թեմաներն ուղիղ կապ ունեն կանանց ներգրավման խնդրի հետ ու առաջին հերթին նկատի ունեմ մանկապարտեզների հասանելիությունը:
Ակնհայտ է, որ շատ դեպքերում մանկապարտեզների հասանելիության պակասությունը խոչընդոտ է կանանց համար՝ զբաղվել իրենց կրթությամբ, բիզնեսով և զարգացնել իրենց հմտությունները:
Մյուս կողմից մանկապարտեզները կրթության առաջին աստիճանն են, որոնք մոլեկուլյալ մակարդակում պետք է ներդնեն այն հնարավորությունները, որոնք հետագայում պետք է օգտագործվեն: Ցանկացած տարիքում մարդը կարող է կանգնել սեփական կյանքը կառավարելու հմտությունների առաջ: Մեր քաղաքականությունն է մարդկանց աջակցել, որ նրանք իրենց կյանքը նոր իրավիճակներում կառավարելու ավելի լայն հնարավորություն ունենան»,- հայտարարել է Փաշինյանը:
Նա ընդգծել է, որ պետք է հստակ տարանջատել սոցիալական հավասարությունը և սոցիալական արդարությունը: Դրանց կոնցեպտները տարբեր են. «Սոցիալական արդարության հայեցակարգը ենթադրում է, որ մարդը պետք է իր բարեկեցությունը հաստատի սեփական աշխատանքի միջոցով ու իր բարեկեցության մակարդակը պետք է ուղիղ կապի մեջ լինի նրա կատարած աշխատանքի բովանդակության, որակի, արտադրողականության եւ աևդյունավետության հետ:
Սոցիալական քաղաքականությունը պետք է ուղղված լինի աջակցելու մարդկանց, որպեսզի նրանք իրենց աշխատանքի մեջ լինեն ավելի արդյունավետ, արտադրողական ու մրցունակ աշխատանքի շուկայում»,- հավելել է Փաշինյանը:
Նա հավելել է, որ ցանկացած հասարակության մեջ կան որոշակի սոցիալական խմբեր, որոնց դեպքում այս բանաձեւը օբյեկտիվ պատճառներով չի կարող գործել, որովհետեւ մարդիկ կարող են ունենալ ֆունկցիոնալ սահմանափակումներ, առողջական խնդիրներ: