Կիրակի օրը կայացած նախագահական ընտրարշավի երկրորդ փուլում ձայների գրեթե 98%-ի հաշվարկով Մայա Սանդուն հավաքել է ընդհանուր ձայների 54%-ը: Նա համարվում է ԵՄ-ամետ նախագահ եւ երկիրը կղեկավարի երկրորդ ժամկետում:
Ալեքսանդր Ստոյանոգլոյը, ով համարվում է ռուսամետ, ստացել է ձայների 46%-ը:
Սանդուն կողմնակից է, որ Մոլդովան շարունակի դեպի ԵՄ տանող ճանապարհը: Իսկ Ստոյանոգլոն խոստանում էր, որ, որպես նախագահ, ինքը նույնպես կաջակցի ԵՄ ինտեգրմանը, բայց նաև կզարգացնի կապերը Ռուսաստանի հետ՝ ելնելով ազգային շահերից: Նա խոստանում էր փորձել վերականգնել ռուսական էժան գազի մատակարարումները:
«Ես քվեարկեցի հանուն ազատ, կայուն և ծաղկող Մոլդովայի, որը կանգնած չէ ձեռքը պարզած, այլ զարգանում է ներդաշնակորեն՝ հիմնվելով Արևմուտքի և Արևելքի հետ հարաբերությունների վրա», — ասել է Ստոյանոգլոն իր քվեարկությունից հետո:
Բրյուսելը ուշադրությամբ հետեւում էր Մոլդովայի ընտրություններին այն բանից հետո, երբ Վրաստանը՝ նույնպես նախկին խորհրդային պետություն, վերընտրեց իշխող կուսակցությանը, որն Արևմուտքում համարվում է ռուսամետ:
Ստոյանոգլոյի «Արևելք-Արևմուտք» հավասարակշռող հռետորաբանությունը հակադրվում էր Սանդուի չորս տարվա իշխանությանը, որի ընթացքում Կրեմլի հետ կապերը փլուզվեցին, Մոսկվայի դիվանագետները վտարվեցին, և նա դատապարտեց Ռուսաստանի ներխուժումն Ուկրաինա:
Մոսկվան Սանդուի իշխանություններին անվանում է «ռուսաֆոբ»: