Իսրայելական ռազմական ինքնաթիռները չորեքշաբթի ավելի քան 17 ավիահարվածներ են հասցրել Լիբանանի մայրաքաղաք Բեյրութի հարավային արվարձաններին։ Հայտնում են, որ սեպտեմբերի 23-ին Իսրայել-Հըզբոլլահ պատերազմից հետո սա ամենաուժեղ ռմբակոծություններից մեկն էր:
Լիբանանի պետական ազգային լրատվական գործակալությունը (NNA) հաղորդում է, որ իսրայելական հարձակումը ներառում է չորս հարված Լեյլաքի արվարձանում, որոնք ավերել են վեց շենք և հրդեհներ են առաջացրել: Թեև գործակալությունը չի հստակեցրել, թե ինչ տեսակի շինություններ են տուժել, այն ասում է, որ ավերվել է բնակելի համալիր:
Նաև ասվում է, որ իսրայելական ինքնաթիռները ոչնչացրել են լիբանանյան «Հեզբոլլահ» խմբավորման հետ կապված Al Mayadeen հեռուստաալիքի գրասենյակը։ Հաղորդվում է, որ ռազմական ինքնաթիռները երկու հրթիռ են արձակել գրասենյակի ուղղությամբ:
Լիբանանի Առողջապահության նախարարությունը հայտնել է, որ իսրայելական ավիահարվածները Ջնահ արվարձանում սպանել են մեկ մարդու և վիրավորել հինգին, այդ թվում՝ մեկ երեխայի, որը ստիպված է եղել հոսպիտալացվել:
Հայտարարության մեջ կոչ է արվել բնակիչներին անհապաղ տարհանել, քանի որ նրանք գտնվում են «Հեզբոլլահի հետ կապված օբյեկտների մոտ, որոնք բանակը պլանավորում էր թիրախավորել մոտ ապագայում»: Սա առաջին դեպքը չէ, երբ իսրայելական բանակը կոչ է անում տարածքի բնակիչներին տարհանել ավիահարվածներից առաջ:
Լիբանանի առողջապահության նախարարության տվյալներով՝ անցյալ տարվա հոկտեմբերից Իսրայելի հարձակումների հետևանքով առնվազն 2574 մարդ է զոհվել, ավելի քան 12 հազարը վիրավորվել է: Իսրայելն այս տարվա հոկտեմբերի 1-ին ընդլայնեց հակամարտությունը՝ ցամաքային հարձակում սկսելով Լիբանանի հարավում: