Սեպտեմբերի 1-ին ԱՄՆ պահպանողական «Դեյլի Քոլլեր» լրատվական կայքին տված հարցազրույցում Թրամփն ասել է, որ երկու տասնամյակ առաջ Իսրայելն ուներ «Կոնգրեսում ամենաուժեղ լոբբին», բայց որ դրա ազդեցությունը այդ ժամանակից ի վեր նվազել է։
«Իսրայելը ամենաուժեղն էր։ Այսօր այն այդքան ուժեղ լոբբի չունի։ Դա զարմանալի է: Կար մի ժամանակ, երբ չէիր կարող վատ խոսել, եթե ուզում էիր քաղաքական գործիչ լինել, չէիր կարող վատ խոսել: Բայց այսօր կա ԱՕԿ [Ալեքսանդրիա Օկասիո-Կորտես] գումարած երեքը, և կան այս բոլոր խելագարները, և նրանք իսկապես փոխել են իրավիճակը», — ավելացրեց նա՝ նկատի ունենալով առաջադեմ օրենսդիրներին, որոնք Իսրայելին ԱՄՆ-ի ռազմական աջակցության աղմկոտ քննադատներ են եղել:
«Իսրայելը ամենաուժեղ լոբբին էր, որ ես երբևէ տեսել եմ։ Նրանք լիակատար վերահսկողություն ունեին Կոնգրեսի նկատմամբ, իսկ հիմա՝ ոչ, գիտեք, ես մի փոքր զարմացած եմ դա տեսնելով», — ասաց նա։
ԱՄՆ Կոնգրեսում գնալով ավելանում են այն օրենսդիրների թիվը, ովքեր Իսրայելի գործողությունները Ղազայում հրապարակավ անվանում են «ցեղասպանություն» և դեմ են Իսրայելին տրամադրվող հակահրթիռային պաշտպանության ֆինանսավորմանը։ Անցյալ ամիս Սենատում դեմոկրատների կեսից ավելին աջակցեց ԱՄՆ-ից Իսրայելին զենքի վաճառքը խոչընդոտելու միջոցառումներին։
Դեռեւս երկու տարի առաջ իսրայելական լոբբին բավականին ուժեղ ու ազդեցիկ էր ԱՄՆ-ում, երկրի Կոնգրեսում: Սակայն իրավիճակը այլ է հիմա: Ըստ ամերիկյան տարբեր սոցհարցումների, ԱՄՆ չափահասների 53 տոկոսն այժմ բացասաբար է վերաբերվում Իսրայելին , ինչը 2022 թվականի 42 տոկոսի համեմատ ավելի է։
Քվինիպիակ համալսարանի անցյալ շաբաթ անցկացված հարցումը ցույց է տվել, որ ընտրողների 60 տոկոսը դեմ է Իսրայելին լրացուցիչ ռազմական օգնություն ուղարկելուն: Հարցվածների կեսը ասել է, որ Իսրայելը ցեղասպանություն է իրականացնում Ղազայում։