Ինչպես հայտարարվեց «Մեր ձևով» ժողովրդակամավորական շարժման շնորհանդեսի ժամանակ, շարժումն ունի հինգ աշխատանքային խումբ: Ի տարբերություն շարժման հնչեցրած թույլ քաղաքական ուղերձների, շարժման տնտեսական ուղերձն ավելի խոսուն ու բովանդակալից է: Գուցե, դա պայմանավորված նրանով, որ շարժումը դեռեւս չի անցել իր քաղաքական փուլին:
Տնտեսական ոլորտի ավելի խոստումնալից ծրագիրը, գուցե, պայմանավորված է Սամվել Կարապետյանի գործոնով: Նա, տնտեսական գործիչ է, հաջողակ գործարար, ով իր տեղն ունի աշխարհի ամենահարուստ մարդկանց շարքում:
Այս շարժման տնտեսական աշխատանքային խումբն ունի տեսանելի, ռեալ ու հստակ ծրագիր:
Տնտեսական ոլորտը համակարգող տնտեսագետ Աշոտ Պարսյանը շարժման շնորհանդեսի ժամանակ իր ելույթում խոսեց ամփոփ, հակիրճ, բայց բավականին բովանդակալից: Պարսյանի առաջադրած թեզերը հիմնավորված էին:
Նա իր ելույթում նշեց, որ Հայաստանը իր ավելի քան երեսունամյա կյանքում տնտեսության զարգացման իր մոդելը չի ստեղծել, այլ եղել է ԽՍՀՄ տնտեսության շարունակողը:
Աշոտ Պարսյանը խոսեց տնտեսական ոլորտի հիմնախնդիրներից, ներդրումների ծավալների նվազման մտահոգություններից, գործազրկության խնդիրներից: Վերջին տարիների տնտեսական աճը նա պայմանավորեց ուկրաինական պատերազմով եւ պետական պարտքի մեծացմամբ: Խոսեց պետական պարտքի անարդյունավետ ծախսերի մասին: Շեշտեց, որ Հայաստանը ետ է մնում համաշխարհային տնտեսությունից:
Ներկայացրեց կառուցվածքային բարեփոխումների իրենց տեսլականը. բյուրոկրատիայի նվազեցում, հարկային բարեփոխումներ. զբոսաշրության զարգացման կարեւորություն: Ըստ Պարսյանի, պետք է վարել այնպիսի տնտեսական քաղաքականություն, որ Հայաստանը վստահելի դառնա արտաքին ներդրղների համար, Հայաստանում սեփականության իրավունքը պետք է դառնա անձեռնմխելի:
Ըստ բանախոսի, կարեւոր է նոր պղնձաձուլարանի, նավթավերամշակման եւ ոսկու աֆինաժի գործարանների կառուցումը, որոնք կարեւոր են երկրի վստահելության, հեղինակության համար:
Խոսվեց պաշտպանական արդյունաբերության, դեղագործություն ոլորտների զարգացման կարեւորության մասին:
Իսկ ֆերմեր-գործարար Հարություն Մնացականյանը ներկայացրեց գյուղատնտեսության ոլորտի խնդիրները, այն բնութագրելով որպես խոցելի ու մտահոգիչ ոլորտ: Գյուղնշանակության հողերի կեսը չի օգտագործվում, ոռոգման համակարգը անմխիթար վիճակում է: Պարենային ինքնաբավության ցուցանիշները ցածր են: Շեշտադրում կատարվեց կարեւոր հանգամանքի վրա. չեն վերահսկվում պարարտանյութերի օգտագործման չափանիշները , ինչի հետեւանքով բնակչության առողջությունն է տուժում: Գյուղտեխնիկայի մաշվածության ու հնացածության խնդրին նույնպես անդրադարձ եղավ:
Խոսվեց ոչ միայն խնդիրներից, այլեւ՝ լուծման ուղիներից:
Շարժումը կարեւորություն է տալիս ՏՏ ոլորտի զարգացմանը: Այն համակարգում է Ռոբերտ Կադրյանը, ով Հայաստանում ամենաշատ թվայնացում իրականացրած ընկերության ղեկավարն է եւ համոզված է, որ ՏՏ ոլորտի զարգացումը կհեշտացնի քաղաքացու կյանքը. հեռախոսի մեջ համապատասխան թվային ծառայության առկայության դեպքում կարելի է անցում կատարել նորագույն տեխնոլոգիաների, ասենք ՝թոշակի անցնելու համար ոչ թե փաստաթղթեր հավաքել եւ դիմել սոցապ ծառայություն, այլ համակարգը ինքը կգտնի ու կհրավիրի քաղաքացուն: Հայաստան կարող են գալ մեկ ճամպրուկով եւ մեկ համակարգիչով՝ սկսելու իրենց բիզնեսը:
Նաիրա Վանյան