Ադրբեջանում Բելգիայի Թագավորության արտակարգ և լիազոր դեսպան Ժուլիեն դե Ֆրայպոնի հավատարմագրերի ընդունման արարողության ժամանակ Ադրբեջանի նախագահ Իլհամ ԱԼիեւն ասել է.«Եվրամիությունը, ինչպես նախկինում, պետք է չեզոքություն պահպանի հայ-ադրբեջանական խաղաղության հարցում։ Այսպիսով, Եվրամիությունը երբեք ակտիվ չի եղել այս հարցում ադրբեջանական հողերի օկուպացիայի ժամանակ։ Այն ժամանակ Եվրամիությունն ու եվրոպական կառույցները արձագանքեցին Բաքվի բազմաթիվ խնդրանքներին, թե այդ հարցով զբաղվում է Մինսկի խումբը, իսկ Եվրամիությունը դրա հետ կապ չունի։ Սակայն այս գործընթացում Եվրամիության ակտիվ ներգրավվածությունը ներկայումս տեսանելի է։ Ոմանք Բրյուսելում՝ Եվրամիության կենտրոնակայանում, կողմնակալություն են ցուցաբերում։ Սա անարդյունավետ դիրքորոշում է, որը միայն անվստահություն է ծնում և մեկուսացնում Եվրամիությանը նորմալացման գործընթացից: Հնարավորության դեպքում ես խորհուրդ կտայի հանուն Եվրամիության և Ադրբեջանի միջև շարունակական համագործակցության չգնալ Ֆրանսիայի ճանապարհով և չընկնել նրա ազդեցության տակ։ Որովհետև Ֆրանսիայի քաղաքականությունը հայ-ադրբեջանական հարաբերությունների կարգավորման հարցում ապակառուցողական էր և այդպես էլ մնում է»։
Նա նաև ընդգծել է, որ Ադրբեջանի և Եվրամիության հարաբերություններում անվստահություն առաջացնող հարցերից մեկը «եվրոպական դիտորդական առաքելության երկարաձգումն է սահմանին՝ «առանց Բաքվի համաձայնության կամ նույնիսկ առանց խորհրդակցության»։ «Ի՞նչ կարիք կար սրա համար։ 2022 թվականի հոկտեմբերին Պրահայում Ադրբեջանը պայմանավորվել է, որ այդ առաքելությունն այնտեղ կմնա 2 ամիս և բաղկացած կլինի սահմանափակ թվով պաշտոնաթող սպաներից։ Սակայն երբ առաքելությունը երկարաձգվեց, Ադրբեջանի հետ ոչ ոք չխորհրդակցեց։ Իսկ այժմ բանակցություններ են տարվում այն լրացուցիչ ժամկետով երկարացնելու ուղղությամբ։ Առաքելության անդամների պահվածքը, ինչպես ասում են՝ «երկադիտական դիվանագիտություն», միանգամայն անընդունելի էր և դուրս էր քաղաքական մշակույթի նորմալ չափանիշներից, և ադրբեջանական կողմը այդ հարցը բարձրացնելու է Եվրամիության հետ շփումներում»,- ասել է Ալիեւը։
«Այսպիսով, ցավալի կլինի, եթե հայ-ադրբեջանական հարաբերությունների պատճառով Ադրբեջանի և ԵՄ-ի համագործակցության հետընթաց լինի»,- ասել է Ալիեւը, հույս հայտնելով, որ Ադրբեջանի և ԵՄ-ի միջև երկկողմ հարաբերությունները կզարգանան՝ անկախ հայ-ադրբեջանական օրակարգից։