Ադրբեջանական լրատվամիջոցները հայտնում են.«Ադրբեջանը հրետանային ստորաբաժանումների և անօդաչու թռչող սարքերի կիրառմամբ զորավարժություններ է անցկացրել: Զորավարժությունների ընթացքում ստորաբաժանումները հաղթահարել են տարբեր խոչընդոտներ և իրականացրել կրակային դիրքեր գրավելու գործողություններ՝ մարտական պատրաստության վիճակի բերելով զինտեխնիկան և հրետանային կայանքները։ Անօդաչու թռչող սարքերի ստորաբաժանումների հետ համատեղ որոշվել են պայմանական հակառակորդի ցամաքային թիրախների կոորդինատները»:
Վերջին շրջանում Ադրբեջանը բավականին հաճախ է զորավարժություններ անում Հայաստանի «թքթի» տակ, ավելացնում իր ռազմական բյուջեն, մեծացնում ռազմական պոտենցիալը: Մեծ նախապատրաստությունների մեջ է նաեւ դիվանագիտական դաշտում. տարբեր գերտերությունների ու տերությունների հետ հարաբերություններ է շտկում, կապեր ու պայմանավորվածություններ ձեռք բերում: Ակնհայտ է, որ Ալիեւը մեծ «հարսանիքի» պատրաստվող «հարսանքավորի» նման խառն է. անելիք ունի: Իսկ այդ անելիքը վերաբերում է հենց մեզ՝ Հայաստանին: Ադրբեջանի ցամաքային թիրախներն ու այդ թիրախների կոորդինատները, որոնց, առայժմ զորավարժությունների մակարդակով, խոցում են ադրբեջանական զինյալները, բնականաբար, գտնվում են Հայաստանում: Իսկ ինչո՞վ է զբաղված Հայաստանի ղեկը ձեռքին պահող Նիկոլ Փաշինյանը. հեծանիվ է քշում, «Կեցցե՛ հեծանիվը» կարգախոս առաջ բերում, արշավներ կազմակերպում, մրցանակներ տալիս, փարթի-շոուներ անում, ՄԱԿ ամբիոնից Հայաստանի առջեւ ծառացած մարտահրավերներից խոսելու փոխարեն իր նախընտրական կարգախոսն է վերաթարմացնում. թե բա՝ ապագա կա…
Իսկ պատգամավորների հարցերին, որոնք առընչվում են երկրի արտաքին մարտահրավերներին, պատասխանելու փոխարեն լաչառություն է անում, մանիպուլացնում ու թեման փակում…