Երբ Դանիայով գնում ես, փողոցում ավելի շատ հեծանիվ կա, քան ավտոմեքենա: Այս մասին, այսօր՝ նոյեմբերի 14-ին, ԱԺ-ում 2025 թվականի պետական բյուջեի քննարկման շրջանակներում իր ամփոփիչ խոսքում նշել է Նիկոլ Փաշինյանը:
«Հիմա էլ ընկել եք հեծանիվի հետևից, հիմա էլ ասում եք՝ «ինչո՞ւ ես հեծանիվ քշում», բա դրա համար ենք քշում, որ դուք էլ քշեք»,- դիմելով ԱԺ ընդդիմությանը՝ նշել է նա։
Փաշինյանն ասել է, թե հիմա էլ նոր խոսք են սկսել ասել՝ «վարչապետը, փոխանակ մտածի անվտանգության հարցերի մասին, հեծանիվ է քշում»։
«Ընկներնե՛ր, ես ձեր տների պատերի տակով եմ հեծանիվ քշում, այն ժամերին, որ ես քշում եմ, դուք քնած եք, ընդ որում՝ խորը։ Ծնգծնգացնում եմ՝ մի հատ վառվող լույս չկա»,- ասել է նա։
Փաշինյանն ասել է նաև, թե անգամ իր հեծանիվ քշելը ավարտելուց հետո էլ ընդդիմությունը խորը քնած է. «Երբ ես գնում եմ աշխատանքի, դուք դեռ պետք է երկու ժամ էլ քնեք:
Կամ ասում են՝ ճանապարհը փակում են, որ վարչապետը հեծանիվ քշի: Ես կիրակի Սեւանից հեծանիվով եկել եմ Երեւան: Իմ կողքով հազարավոր մեքենաներ են անցել: Թող մեկն ասի, որ որեւէ մեկի մեքենան կանգնացրել է: Ես մենակ եմ եղել՝ երկու թիկնապահների հետ: Իսկ երբ խմբով են հեծանիվ քշում, դա անվտանգության կանոնի մեջ է: Վարչապետը չլինի, ով ուզում է լինի, եթե 60 հոգով հեծանիվ են քշում, ոստիկանությունը պետք է ապահովի անվտանգությունը»,- ասել է նա։
Անդրադառնալով ընդհանրապես ճանապարհ փակելուն, Փաշինյանն ասել է. «Այո, վարչապետը կարող է երկու ժամ նստի խցանման մեջ, ԱԺ գալիս էլ ուշանա, ուր գնա՝ ուշանա, հետո ասեք՝ չի հարգում մարդկանց»: