Եվ այսպես, Նիկոլ Փաշինյանի՝ ընտրված համայնքապետերի դեմ սանձազերծած քաղաքական ռեպրեսիաների ալիքը հասավ Մասիս. Գյումրիի քաղաքապետարանի վրա ոստիկանական գրոհը եւ քաղաքապետին ձերբակալելու օպերացիան «հաջողությամբ» իրականացնելուց հետո պարզվեց, որ այժմ թիրախում Մասիսի քաղաքապետն է: Երեւանի քրեական դատարանը (դատավոր Ժ.Չիչոյան) հրապարակեց դատավճիռ, որով Մասիս համայնքի ղեկավար, Դավիթ Համբարձումյանին դատապարտեց 6 տարի 3 ամիս ժամկետով ազատազրկման, վերացվեց գրավը և որպես խափանման միջոց կիրառեց կալանք:
Նշենք, որ ԱԺ «Պատիվ ունեմ» խմբակցությունը, նախաձեռնելով Նիկոլ Փաշինյանին իմպիչմենթի ենթարկելու գործընթաց, Դավիթ Համբարձումյանին առաջադրել է վարչապետի թեկնածու: Այս օրերին Համբարձումյանը գտնվում էր Մոսկվայում: Դատավճռից հետո նա հայտարարեց, որ իր վերադարձի տոմսը գնված է հոկտեմբերի 28-ի համար եւ, որ ոչինչ չի փոխվել.« 7,5 տարի անց ինձ շինծու գործով շուտափույթ ազատազրկելու որոշումը խոսում է այն մասին, որ իմ դեմ կիրառված պատժամիջոցը բացառապես քաղաքական է։ 7.5 տարի առաջ տեղի ունեցած միջադեպի առիթով հարուցված քրեական գործը կարճվել է այդ միջադեպի բոլոր մասնակիցների մասով և միայն ինձ է այս իշխանությունը դիտարկել որպես կազմակերպիչ՝ ամեն ինչ անելով, որպեսզի հայտնվեմ անազատության մեջ։…. Նիկոլից ու նրա կամակատար դատաիրավական համակարգից փախչելու միտքն անգամ բացառում եմ։ Շուտով կլինեմ Հայաստանում և բոլորս միասին կպայքարենք իմ, Սրբազան Հայրերի, այլ քաղբանտարկյալների և մեր ամբողջ երկրի ազատության համար։ Աստծով»։
Հիշեցնենք, որ Համբարձումյանին վերագրվող արարքը վերաբերում է 2018-ի իրադարձություններին: Այսօր տարիների հեռվից արդեն կարող ենք արձանագրել, որ 2018-ին շատերս ենք սխալվել, շատերս ենք մոլորվել ու մանիպուլացվել ոչ միայն Փաշինյանի կողմից… Դավիթ Համբարձումյանը այն բացառիկ մարդկանցից է, ով վստահորեն ու բաց ճակատով կարող է ասել, որ ինքը Նիկոլին չի բերել: Թե՝ ովքեր են բերել, դա այլ հարց է, բայց Դավիթ Համբարձումյանը այդ ամենի մեղսակիցը չէ…
2018-ից հետո շատ համայնքապետեր, տարբեր պաշտոնյաներ, գործարարներ, անցան Փաշինյանի «թրի տակով», «դավանափոխ» եղան, սկսեցին անձրեւանոց պահել ՔՊ-ական իշխանիկների վրա, գործարքների գնալ: Բայց Դավիթ Համբարձումյանը երբեք որեւէ գործարքի չգնաց Նիկոլի հետ: Նա միայն աշխատում է Մասիսի համայնքի խնդիրների լուծմամբ ու լավ է աշխատում:
2024թ-ի օգոստոսին Նիկոլ Փաշինյանն Արարատի մարզ այցի շրջանակներում եղավ նաեւ Մասիս քաղաքում: Այդ օրը Մասիսի քաղաքապետը նրան չդիմավորեց. ասում էին՝ երկրից դուրս է եկել: Համբարձումյանը երկրից դուրս էր եկել, որպեսզի չդիմավորե՞ր Փաշինյանին, որպեսզի չսեղմե՞ր նրա ձեռքը, թե՞ դա, պարզապես, զուգադիպություն էր: Դժվար է ասել: Սակայն, փաստ է, որ այս անգամ էլ նա չսեղմեց Արցախը հանձնողի ձեռքը: Դրանից հետո լուրեր էին շրջանառվում, որ քաղաքապետի գործերը «քրքրում են», որպեսզի վրան գործ հարուցեն: Փաստորեն, «քրքրանքների» մեջ քրեական գործի «մատերիալ» չգտան եւ նորից հիշեցին յոթ ու կես տարվա վաղեմության, մոռացված ու 2018-ի շինծու գործը:
Վաղը Համբարձումյանը վերադառնում է Հայաստան՝ լավ իմանալով, որ իրեն կալանավորելու են: Իսկ մասիսցիները պատրաստվում են գնալ օդանավակայան՝ դիմավորելու եւ իրենց զորակցությունը հայտնելու իրենց ընտրած համայնքապետին…
ՆԱԻՐԱ ՎԱՆՅԱՆ