ԱՄՆ նախագահ Դոնալդ Թրամփը երեքշաբթի օրը լարված հեռախոսազրույց է ունեցել Իսրայելի վարչապետ Բենիամին Նեթանյահուի հետ, որի ընթացքում նա դժգոհություն է հայտնել Դոհայի վրա հարվածի վերաբերյալ։
Այս մասին չորեքշաբթի օրը հայտնել է Wall Street Journal-ը՝ հղում անելով աղբյուրներին։
Ըստ նրանց տեղեկությունների՝ ԱՄՆ նախագահը Իսրայելի վարչապետին ասել է, որ Կատարի մայրաքաղաքին հարվածելու որոշումը «խելամիտ չէր»։ Թրամփը նաև դժգոհ է եղել, որ հարձակման մասին իմացել է ոչ թե Իսրայելից, այլ ամերիկյան զինվորականներից։ Իսրայելի կառավարության ղեկավարի հետ զրույցում նախագահը ընդգծել է, որ հրեական պետությունը հարձակվել է ԱՄՆ դաշնակցի տարածքի վրա, որը միջնորդ է հանդես եկել Գազայի հատվածում ռազմական գործողությունը դադարեցնելու բանակցություններում։ Նեթանյահուն պատասխանել է, որ ինքը «փոքրիկ հնարավորություն» ունի հարվածելու համար և անհրաժեշտ է համարում այն օգտագործել։
Աղբյուրը նշել է, որ երկու առաջնորդների միջև հաջորդ հեռախոսազրույցը ավելի տաք է եղել։ Թրամփը հարցրել է Նեթանյահուին, թե արդյոք հարձակումը հաջողված է եղել։ Վարչապետը պատասխանել է, որ դեռ չգիտի։
Սեպտեմբերի 9-ին Դոհայում տեղի է ունեցել մի շարք պայթյուններ։ Իսրայելի բանակի մամուլի ծառայությունը հայտնել է, որ Ռազմաօդային ուժերը, որոնք աջակցվում են Գլխավոր անվտանգության ծառայության կողմից, հարվածել են Համասի ներկայացուցիչներին։ Կատարի վարչապետի խորհրդական և արտաքին գործերի նախարարության խոսնակ Մաջիդ բին Մոհամմեդ ալ-Անսարին հաստատել է, որ հարձակման համար պատասխանատու է Իսրայելը: Ըստ էմիրության ներքին գործերի նախարարության՝ զոհվել է անվտանգության աշխատակից, իսկ մի քանիսը վիրավորվել են: Համասը հերքել է լրատվամիջոցների հաղորդագրություններն այն մասին, որ իր բանակցային պատվիրակության անդամները զոհվել են՝ ընդունելով, որ հարձակման հետևանքով զոհվել է վեց մարդ, այդ թվում՝ Կատարի անվտանգության ուժերի անդամ և շարժման առաջնորդներից մեկի՝ Գազայի հատվածում Խալիլ ալ-Հայիի որդին: