ԱՄՆ նախագահ Դոնալդ Թրամփը հայտարարել է, որ կցանկանար, որ Միացյալ Նահանգները Հարավային Կորեայում գտնվող իր ռազմական բազաների հողերի սեփականության իրավունքը ստանա, այլ ոչ թե վարձակալի այն։
Երկուշաբթի օրը Հարավային Կորեայի նոր նախագահ Լի Չժե Մյունի կողքին նստած՝ Թրամփը պնդեց, որ Վաշինգտոնը մեծ ներդրումներ է կատարել Կորեական թերակղզու ենթակառուցվածքներում և այնտեղ պահպանում է «ավելի քան 40,000 զինվորական» , սակայն այդ օբյեկտների տակ գտնվող հողերը շարունակում են վարձակալված լինել Սեուլից։
«Գուցե ես կցանկանայի խնդրել նրանց, որ մեզ տան այն հողի սեփականության իրավունքը, որտեղ մենք ունենք մեծ ամրոց», — ասաց նա։ «Ես կցանկանայի տեսնել, թե արդյոք կարող ենք ազատվել վարձակալության պայմանագրից և սեփականության իրավունք ստանալ այն հողի, որտեղ մենք ունենք հսկայական ռազմական բազա»։
Թրամփը չի մանրամասնել, թե որ ռազմական «ամրոցն» է նկատի ունեցել։ Հարավային Կորեայում ԱՄՆ ամենամեծ օբյեկտը՝ Քեմփ Համֆրիսը, ավարտվել է 2018 թվականին՝ տասնամյակ տևած վերաբնակեցման նախագծից և երկու կառավարությունների կողմից միլիարդավոր դոլարների ֆինանսավորումից հետո։ Միացյալ Նահանգներն այժմ շահագործում է իր արտասահմանյան բազաները երկարաժամկետ վարձակալության համաձայնագրերի և Ուժերի կարգավիճակի մասին պայմանագրերի համաձայն, որոնք Վաշինգտոնին տալիս են գործառնական վերահսկողություն՝ միաժամանակ պահպանելով ընդունող երկրի դե յուրե ինքնիշխանությունը։
Հ/Գ Սա պետք է մտահոգի ու սթափեցնի ՀՀ քաղաքացիներին ու իշխանությանը, ովքեր ՀՀ տարածքում, ինչ-որ խաչմերուկ անվան տակ, 100 տարվա վարձակալությամբ միջանցք են տալիս ԱՄՆ-ին: Չի բացառվում, որ ԱՄՆ-ն այստեղ իր «պարտականությունները» կատարելու համար ռազմաբազա տեղակայի հենց իր թշնամի Իրանի քթի տակ: Ոչ ոք չի կարող ԱՄՆ-ի ձեռքը բռնել: Իսկ տարիներ անց այդ տարածքի համար սեփականության իրավունք կպահանջի: ԱՄՆ-ի՝ Իրանին մոտենալն ունի իր աշխարհաքաղաքական նպատակներն ու կունենա ծանր հետեւանքները՝ Հայաստանի տարածքը պատերազմական թատերաբեմ դառնալու հեռանկարով: